ოპოზიცია ცდილობს საპროტესტო მუხტის აწევას არაფრიდან, ნულიდან. ნულია მათი პერსპექტივა იქიდან გამომდინარე, რომ სერიოზულად საუბარიც კი არ შეიძლება. ერთი ფაქტიც კი ვერ დადეს არა თუ გაყალბების, არამედ სერიოზული დარღვევის, – განაცხადა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ.
„არჩევნებზე დარღვევის სამი ფაქტი მოხდა: პირველი დადგმული სცენა, სადაც უბანი საერთოდ გაუქმდა, ანგარიშშიც არ ჩაუთვლია ცესკოს. დარწმუნებული ვარ გამოიძიებენ ამ ფაქტს. მეორე ფაქტი, სადაც „ლელოს“ წარმომადგენელი ცდილობდა ჩაყრას და მესამე, სადაც სამი ბიულეტენი მიაწოდა ერთად, მტკიცებულებები გამოქვეყნდა და სამივეგან „გახარიას“ პარტიაა შემოხაზული.
ძალადობა სადაც იყო ყველაზე მეტი, იყო ვაზისუბნის და ისნის ერთ-ერთი საარჩევნო უბნებზე. „ნაცმოძრაობის“ ზონდერები, რომლებიც საერთოდ არ იყვნენ თბილისში ჩაწერილები, იყვნენ ახმეტიდან ჩამოსული ადამიანები, სცემდნენ, შეურაცხყოფას აყენებდნენ და პროვოკაციებს უწყობდნენ „ქართული ოცნების“ ამომრჩევლებს.
რატომღაც შემთხვევით დაემთხვა, რომ „ნაცმოძრაობის“ ერთ-ერთი ტელევიზიის წარმომადგენელი აღმოჩნდა იქ. მთელი დღის განმავლობაში, სადაც იყვნენ აღნიშნული ტელევიზიის წარმომადგენლები, მაინცდამაინც იქ ატყდებოდა ხოლმე „ნაცმოძრაობის“ ზონდერების მიერ „ქართული ოცნების“ ამომრჩევლის ცემა-ტყეპა და დედის გინება. სადაც ისინი არ იყვნენ ფოთოლიც კი არ გარხეულა.
ამ დრომდე ვერ გავიგეთ პასუხი რა უნდოდათ ახმეტელ „ნაცმოძრაობის“ მომხრეებს ისნის საარჩევნო უბანზე. ცხადია უნდოდათ პროვოკაცია და მერე ვიღაცებს ეთქვათ რომ ძალადობრივი საარჩევნო გარემო იყო“, – აღნიშნა მამუკა მდინარაძემ.
