დამკვიდრებულია ასეთი ტერმინი „ლიბერალური ნარკოპოლიტიკა“, რაც, მე ვიტყოდი, არის იმ იდეოლოგიის გაგრძელება, რასაც ჩვენ ფსევდოლიბერალურ იდეოლოგიას ვუწოდებთ. ნარკოტიკები ანადგურებს არა მხოლოდ ჯანმრთელობას, არამედ ღირებულებებსაც. ეს არის ამ ე.წ. ფსევდოლიბერალური იდეოლოგიის ერთ-ერთი მთავარი ამოცანა, რომ ახალგაზრდებში განადგურდეს ღირებულებები, რასაც ჩვენ აუცილებლად უნდა დავუპირისპირდეთ, – ამის შესახებ პრემიერ-მინისტრმა, ირაკლი კობახიძემ მთავრობის სხდომაზე განაცხადა.
„თემა, რომელსაც ასევე მინდა შევეხო, არის ნარკოტიკების საკითხი, ნარკოპოლიტიკა. ეს არის საზოგადოებაში ერთ-ერთი ყველაზე სერიოზული პრობლემა, რაზეც ჩვენი პოლიტიკური გუნდის წევრებიც ხშირად საუბრობენ. მინდა მადლობა გადავუხადო შინაგან საქმეთა მინისტრ ვახტანგ გომელაურს იმისათვის, რომ რამდენიმე ძალიან მნიშვნელოვანი ოპერაცია ჩატარდა გასული პერიოდის განმავლობაში, მოხდა რეალიზატორებისა და ქსელების იდენტიფიცირება, თუმცა კიდევ უფრო მეტია საჭირო, იქიდან გამომდინარე, რომ კვლავაც სახეზეა ნარკოტიკების რეალიზაციის, მოხმარების ფაქტები. არის გარკვეული სისტემური მოვლენებიც, რაც ამას უკავშირდება. დამკვიდრებულია ასეთი ტერმინი „ლიბერალური ნარკოპოლიტიკა“, რაც, მე ვიტყოდი, არის იმ იდეოლოგიის გაგრძელება, რასაც ჩვენ ფსევდოლიბერალურ იდეოლოგიას ვუწოდებთ. ეს არის ამ იდეოლოგიური ხაზის ერთ-ერთი მნიშვნელოვანი ნაწილი, რასაც უნდა დავუპირისპირდეთ. ეს არ არის ის იდეოლოგია, რომელიც შეიძლება იყოს მისაღები ჩვენი საზოგადოებისთვის და რომელიც შეიძლება წაადგეს ჩვენს საზოგადოებას. ნარკოტიკები ანადგურებს არა მხოლოდ ჯანმრთელობას, არამედ ღირებულებებსაც. ეს არის ამ ე.წ. ფსევდოლიბერალური იდეოლოგიის ერთ-ერთი მთავარი ამოცანა, რომ ახალგაზრდებში განადგურდეს ღირებულებები, რასაც ჩვენ აუცილებლად უნდა დავუპირისპირდეთ. ერთი პერიოდი ამ ადამიანებმა მიაღწიეს გარკვეულ წარმატებას ლიბერალური ნარკოპოლიტიკის იდეოლოგიის პროპაგანდის მიმართულებით, თუმცა ჩვენ ამას არავითარ შემთხვევაში არ უნდა შევეგუოთ. მგონია, რომ დაუშვებელია ნებისმიერი ლოიალური დამოკიდებულება ამ საკითხის მიმართ. რა თქმა უნდა, არ ვსაუბრობ მომხმარებლებზე. პირიქით, ჩვენ გვჭირდება ზრუნვა მომხმარებლებზე, რათა უარი ვათქმევინოთ მათ ნარკოტიკების მოხმარებაზე. ეს უნდა იყოს ჩვენი ნარკოპოლიტიკის ერთ-ერთი მთავარი მიმართულება. რაც შეეხება რეალიზაციას და რეალიზატორებს, აქ გვჭირდება მაქსიმალური სიმკაცრე, ეს უნდა იყოს ჩვენი პოლიტიკა. ასევე ყურადღება არის მისაქცევი ფსიქოტროპულ აფთიაქებზე და მინდა ვთხოვო ყველა შესაბამის სამინისტროს, განსაკუთრებით ძალოვან უწყებებს, რომ შევიმუშაოთ ერთიანი განახლებული გეგმა, რათა კიდევ უფრო ეფექტიანი გახდეს ჩვენი ბრძოლა ნარკოდანაშაულის წინააღმდეგ“, – აღნიშნა კობახიძემ.
