შინაგან საქმეთა სამინისტროს საექსპერტო-კრიმინალისტიკურ დეპარტამენტს, ამერიკის შეერთებული შტატების კალიფორნიის შტატის ქალაქ ესკონდიდოს პოლიციის დეპარტამენტის კრიმინალისტიკური სამსახურის უფროსი, ექსპერტი – ბრიანა თუსეინთი ესტუმრა. შეხვედრას ასევე ესწრებოდა ანტინარკოტიკულ და სამართალდამცავ ორგანოებთან თანამშრომლობის ბიუროს (INL) საქართველოს ოფისის დირექტორი – სარა რუპერტი.
სტუმრებს საექსპერტო-კრიმინალისტიკური დეპარტამენტის დირექტორმა – გიორგი თვაურმა უმასპინძლა.
აშშ-ის ანტინარკოტიკულ და სამართალდამცავ ორგანოებთან თანამშრომლობის ბიუროს (INL) ორგანიზებით გამართულ შეხვედრაზე მხარეებმა ორმხრივი თანამშრომლობის საკითხები განიხილეს, მათ შორის თბილისის საექსპერტო-კრიმინალისტიკური სამმართველოსთვის საერთაშორისო ISO17020 აკრედიტაციის მიღებასთან დაკავშირებული პროცედურების დეტალები.
ბრიანა თუსეინთი ადგილზე გაეცნო შემთხვევის ადგილზე ექსპერტების მუშაობის სპეციფიკას, ამერიკული აკრედიტაციის ფარგლებში საექსპერტო-კრიმინალისტიკური დეპარტამენტის მიერ შემუშავებულ სახელმძღვანელოსა და მუშაობის სტანდარტულ სამოქმედო პროცედურებს.
საექსპერტო-კრიმინალისტიკური დეპარტამენტი შემთხვევის ადგილის ISO17020-ის აკრედიტაციის მიღების პროცესში აქტიურად თანამშრომლობს აშშ-ის სახელმწიფო დეპარტამენტის ანტინარკოტიკულ და სამართალდამცავ ორგანოებთან ურთიერთობის საერთაშორისო ბიუროსთან (INL) და განაგრძობს ინტენსიურ მუშაობას ექსპერტიზის სხვა მიმართულებების ეტაპობრივი აკრედიტაციისთვის. – აღნიშნულია შსს-ის მიერ გავრცელებულ ინფორმაციაში.
