იმდენად გამჭვირვალე არჩევნები იქნება წელს, რომ ძალიან რთული იქნება ამ არჩევნებზე რაიმე ცუდის დაწერა. ამის მიუხედავად, თუ დაწერენ უარყოფით დასკვნებს, ქართველი ხალხი ამასაც შეხედავს და ამიტომ ვეუბნებით ჩვენ ბევრ სიმართლეს, – ამის შესახებ საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა მამუკა მდინარაძემ გადაცემაში „იმედი LIVE“ განაცხადა.
„ამავდროულად, ჩვენ გუშინ მთავარი სლოგანი რომ წარმოვადგინეთ, იმ სლოგანთან დაკავშირებითაც კი ავუხსნით ყველაფერს, დეტალურად განვუმარტავთ, რომ მშვიდობა უნდა იყოს იმისათვის, რომ ჩვენ მერე შევძლოთ ღირსებით ევროკავშირისკენ ვიაროთ. ღირსება უნდა შევინარჩუნოთ იმისათვის, რომ შემდეგ მორალური უფლება გვქონდეს და კიდევ მეტად განვვითარდეთ და ეს ყველაფერი, მშვიდობა, ღირსება გვჭირდება იმისათვის და გვინდა იმისათვის, რომ მყარად ვიდგეთ, რომ განვითარებამ კეთილდღეობა მოიტანოს უფრო მეტი მოქალაქის და საბოლოო ჯამში, თითოეული მოქალაქის.
არის ერთი მთავარი თემა, რომელზეც არასწორ წარმოდგენას უქმნიან ჩვენ მოქალაქეებს – ევროკავშირი ავტომატურად ნიშნავს კეთილდღეობას. რეალურად, პირიქით არის – კეთილდღეობა არის ერთ-ერთი უპირობო ნიშანი, რომ ჩვენ ევროკავშირის კარი შევაღოთ. რატომ? ჩვენ ეკონომიკურად თუ არ გავძლიერდით ძალიან, ასე მარტივად ჩვენ ევროკავშირში არავინ მიგვიღებს, ანუ არავინ მიიღებს 4000$-იან მშპ-ს ქვეყანას, მთლიანი შიდა პროდუქტი რომ გაქვს 4000$ ერთ სულ მოსახლეზე, ამას ევროკავშირში არავინ მიიღებს, ეს ქვეყანა ჩავიბარეთ ჩვენ, დღეს გადავცდით 8000-ს, მაგრამ კიდევ მეტს, 10-12-ს უნდა გადავცდეთ, იმისათვის, რომ ევროკავშირმა მიგვიღოს და ტვირთად არ დავაწვეთ ევროკავშირს, ამიტომ ჯერ არის კეთილდღეობა და მისი ლოგიკური გაგრძელებაა ევროკავშირის წევრობა. მომავალი ნათელია, ჩვენ ამის გვჯერა და ეს ნათელი მომავალი ჩვენ უნდა შევქმნათ, უთანასწორო ბრძოლაში უნდა გავიმარჯვოთ და დავარწმუნოთ, როგორც პარტნიორი, როგორც მეგობარი, ასევე ის ძალები, რომლებიც ძალიან გვეჭიდავებიან, რომ საქართველოში უნდა ელაპარაკონ ქართველი ხალხის მიერ არჩეულ ხელისუფლებას. თუ საქართველოში მიიღება საქართველოს შესახებ გადაწყვეტილებები, შემდეგ გაცილებით უკეთ იქნება ყველაფერი, ვიდრე დღეს არის და კიდევ უფრო დავლაგდებით ყველასთან ურთიერთობაში“, – აღნიშნა მამუკა მდინარაძემ.
