ჩვენ ქართველი ხალხი შეიარაღებული გვყავს სიმართლით. არგუმენტებით ვაიარაღებთ ხალხს, რათა 0% იყოს დაშვება იმისა, რომ მწამებელი, აგენტურული რეჟიმი დაბრუნდეს ხელისუფლებაში, – მიმართა მამუკა მდინარაძემ ოპოზიციური მედიის ჟურნალისტს.
კითხვაზე, ხედავს თუ არა საშიშროებას, რომ სწორედ 4 ოპოზიციური პარტია გადაიბარებს ხელისუფლებას და 26 ოქტომბრის შემდეგ, ქვეყანაში კოალიციური მთავრობა იქნება, ასევე, რას ფიქრობენ პარტიაში ხელისუფლების მშვიდობიანად გადაბარების გზებზე, მდინარაძემ განაცხადა: „თქვენ რა გინდათ, გვეშინიაო, რომ ვთქვათ? – არ გვეშინია! შეშინება გინდათ ჩემი?!“.
„ასეთ გზებზე ჩვენ არ ვფიქრობთ, რადგან წარმოუდგენელია! ახლა, როგორც თქვენ გინდათ, ისე ინტერპრეტირებთ და აქვე ატყუებთ საზოგადოებას თქვენი ასეთი დამოკიდებულებით. კიდევ გიმეორებთ, „თუ სასწაული მოხდება“, დაშვების ამ ხარისხით ვლაპარაკობთ და თქვენ ამბობთ, თქვენ უშვებთო“, – მიმართა ჟურნალისტს მდინარაძემ.
მისივე თქმით, ხელისუფლება საუბრობს და რადიკალური ოპოზიციის შესახებ ხალხს სიმართლეს ეუბნება.
„ჩვენ ქართველი ხალხი შეიარაღებული გვყავს სიმართლით. ახლა, როცა მე თქვენს წინაშე ვდგავარ და ასე რომ სპეკულირებთ და მე გპასუხობთ, ეს იმას ნიშნავს, რომ ჩვენ ვაიარაღებთ ხალხს სიმართლით, არგუმენტებით, რაზეც მე ვისაუბრე – ამ არგუმენტებით ვაიარაღებთ ხალხს, რომ 0% იყოს, რაც ასეც არის, დაშვება იმისა, რომ მწამებელი, აგენტურული რეჟიმი დაბრუნდეს ხელისუფლებაში. ეს რომ არ გავაკეთოთ, მერე მართლაც იქნება დაშვება.
რაზეც ახლა წუხხართ, ნერვიულობთ და ანუ, „დაშვებას აკეთებთ?“ ასე გამალებით ცდილობთ ამის გადაფარვას, რაც მე ვილაპარაკე, ამას იმიტომ ვაკეთებთ, რომ დაშვება იყოს ნული. მაგრამ, თუ ხალხს არ უთხარი, რასთან, ვისთან გაქვს საქმე, რა დონის აგენტებთან და რა დონის დავალებების შემსრულებლებთან, მერე მართლაც იქნება საფრთხე, რომ ეს ხალხი დაბრუნდეს ხელისუფლებაში. შემდეგ მე, თქვენ და ზოგადად, ქართველ ხალხს, რისკი იმის კი არ დაგვიდგება, 8% იქნება, 9% თუ 7% ეკონომიკური ზრდა, არამედ ფიზიკურად ვიქნებით თუ არა?! სამწუხაროდ, ახლა თქვენ ემსახურებით იმ ხალხს, ამ ცუდი ინტერპრეტაციით, რომლებიც ამ რისკის წინაშე გაყენებენ“, – მიმართა ოპოზიციური მედიის ჟურნალისტს მდინარაძემ.
