საგამოძიებო კომისიას აქვს დისკრეცია, რომ მოითხოვოს პიროვნების გამოცხადება და ისე გამოკითხვა. მისი მოთხოვნის შეუსრულებლობა, ნებისმიერი მიზეზის და ახსნის მიუხედავად არის სისხლის სამართლის დანაშაული, – განაცხადა საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ, პარტია „ქართული ოცნების“ აღმასრულებელმა მდივანმა, მამუკა მდინარაძემ უმრავლესობის სხდომის დასრულების შემდეგ გამართულ ბრიფინგზე, სადაც მან საგამოძიებო კომისიაში გიორგი გახარიას დაბარებაზე ისაუბრა.
„საგამოძიებო კომისიის მოთხოვნის შეუსრულებლობა არის სისხლის სამართლის დანაშაული. მოტივაცია რა აქვს გახარიას უნდა ვკითხოთ, თუნდაც დისტანციურად. როდესაც კომისიის მოთხოვნაა, რომ ის გამოცხადდეს კომისიის სხდომაზე, სულ რომ მე ახლა დავეთანხმო მეორე მხარის იმ ახირებას, რომ არა, მე მაინც და მაინც დისტანციურად უნდა დავიკითხო, კომისიის მოთხოვნა ასეთია, რომ ის უნდა გამოცხადდეს.
კომისიას გააჩნია თავისი ე.წ. საგამოძიებო ტაქტიკა. პირობითად, შეიძლება ვიღაცას სურდეს წარუდგინოს რაღაც მტკიცებულებები, ამით სწრაფი პასუხი გამოიწვიოს მისი და მთელი რიგი უფლებამოსილება და დისკრეცია არსებობს, რომ კომისიამ მოსთხოვოს მას გამოცხადება და ისე გამოკითხვა. სწორია ეს თუ არა, ამას დავანებოთ თავი, ამის მსჯელობაშიც კი არ უნდა შევიდეთ. კომისიას მიაჩნია, რომ უნდა გამოცხადდეს კონკრეტული პირი და ისე გამოიკითხოს. თუ ამის დისკრეციული უფლება გააჩნია კომისიას, მისი მოთხოვნის შეუსრულებლობა, ნებისმიერი მიზეზის და ახსნის მიუხედავად არის სისხლის სამართლის დანაშაული. იმედია, აქაც ძალით არ დაისჯის რომელიმე ადამიანი და მათ შორის გიორგი გახარია თავს“, – განაცხადა მდინარაძემ.
დროებითმა საგამოძიებო კომისიამ საქართველოს საგარეო პოლიტიკური ინტერესებისთვის ზიანის მიყენების, სიცოცხლის უფლების დარღვევისა და საკუთრების უფლების შელახვის ფაქტების განხილვაზე გიორგი გახარია კიდევ ერთხელ დაიბარა. ყოფილი პრემიერ-მინისტრი კომისიაზე დღეს უნდა გამოცხადებულიყო, თუმცა ის კომისიის წინაშე არ წარდგა. გახარიამ კომისიაზე დისტანციურად ჩართვა მოითხოვა, რადგან ამჟამად საქართველოში არ იმყოფება, თუმცა ამაზე კომისიამ უარი განაცხადა. გიორგი გახარიას კომისიაზე წასადგენად გონივრული ვადა, 9 დღე მიეცა.
