რატომ ვერ შემოდიან დიალოგში ჩვენთან? იმიტომ, რომ თვითონ იციან, რომ ყველა მოთხოვნა, რაც კი დაუყენებიათ ამ წლების განმავლობაში, იყო ყოველთვის უსამართლო და 4 წლის განმავლობაში უსამართლოდ ექცევიან ქართველ ხალხს, – განაცხადა საქართველოს პრემიერ-მინისტრმა, „ქართული ოცნების“ თავმჯდომარემ ევროკომისიის წერილში წამოყენებულ მოთხოვნებთან დაკავშირებით.
მან აღნიშნა, რომ ბრიუსელში ნებისმიერ პოლიტიკოსთან დისკუსიისთვის არის მზად.
„ჩვენ ვამბობთ, რომ ნებისმიერ პოლიტიკოსთან ვართ მზად დისკუსიისთვის, მე პირადად მზად ვარ, დღესვე შემიძლია, გავფრინდე ბრიუსელში. ვინც მეტყვის, ნებისმიერთან დისკუსიისთვის მზად ვარ. იქიდან რა არის პასუხი – საბჭოური მიდგომა. მეტი რა არის საბჭოური მიდგომა, როდესაც არ გესაუბრებიან არაფერზე და მოდიან ცარიელი ულტიმატუმებით, ფოსტით გიგზავნიან ულტიმატუმებს, ადრე როგორც იგზავნებოდა საბჭოთა მოსკოვიდან დეპეშები. ეს ხომ არის იგივე ინკვიზიციური მიდგომა, რაც შუა საუკუნეებში დატოვა თითქოს, ევროპამ და ეს ყველაფერი ჩაბარდა თითქოს წარსულს გასული საუკუნის 40-იანი წლების ბოლოდან, მაგრამ რა სტანდარტებიც იყო ადრე, რატომღაც იგივე სტანდარტები დაბრუნდე დღეს ევროკავშირში.
არ შეიძლება, ევროკავშირი, ევროპული ბიუროკრატია საკუთარ თავს უყურებდეს, როგორც საკავშირო ხელისუფლებას. ჩვენ ეს საკავშირო ხელისუფლების სტანდარტი ჩავაბარეთ წარსულს გასული საუკუნის 80-იანი წლების ბოლოს. ჩვენ გვჭირდება ჯანსაღი, სამართლიანი, პარტნიორული მიდგომა, მათ შორის საუბარი.
როდესაც მართალი ხარ, ნებისმიერ ადამიანს ესაუბრები. ჩვენ მართლები ვართ. ამიტომ ვამბობთ, რომ დღეს გავფრინდები ბრიუსელში, თუ ეს საქმეს სჭირდება და თუ ამის ინტერესი არსებობს. ისინი რატომ ვერ შემოდიან დიალოგში ჩვენთან? იმიტომ, რომ თვითონ იციან, რომ ყველა მოთხოვნა, რაც კი დაუყენებიათ ამ წლების განმავლობაში, იყო ყოველთვის უსამართლო და 4 წლის განმავლობაში უსამართლოდ ექცევიან ქართველ ხალხს”, – განაცხადა ირაკლი კობახიძემ.
