აშშ-ის პრეზიდენტმა დონალდ ტრამპმა გენერალურ პროკურორს პემ ბონდის ძალადობრივი აქციების დამფინანსებელი ორგანიზაციების საქმიანობის გამოძიება დაავალა.
ამერიკის შეერთებული შტატების პრეზიდენტის თქმით, როდესაც აქტივისტები სამოქალაქო ინფრასტრუქტურას აზიანებენ და პოლიციას ქვებს ესვრიან, ეს არა საპროტესტო აქცია, არამედ სისხლის სამართლის დანაშაულია.
ტრამპის შეფასებით, ამ მხრივ განსაკუთრებული პროვოკაციებით გამოირჩევიან დაქირავებული აგიტატორი ქალები. თეთრი სახლის ლიდერის თქმით, ქვეყანაში მრავალი რადიკალი მემარცხენე ჯგუფია.
ტრამპმა ხაზი გაუსვა, რომ კონსერვატორი აქტივისტის ჩარლი კირკის მკვლელის რადიკალიზებაც ონლაინ სივრცეში რადიკალი ჯგუფების მეშვეობით მოხდა.
„ჩვენ ქვეყანაში ბევრი რადიკალურ ჯგუფი გვყავს. მე გენერალურ პროკურორს ვესაუბრე, რომ რეკეტის გავლენისა და კორუფციული ორგანიზაციების შესახებ აქტით გასამართლდნენ ისინი, ვინც მილიონობით დოლარს ხარჯავს აგიტატორებზე. ეს არ არის საპროტესტო აქციები. სისხლის სამართლის დანაშაულია, როცა ქვებს ესვრიან სამართალდამცველების მანქანებს. მე სამართალდამცველებს ვუთხარი, რომ ეს აღარ უნდა მოითმინონ. ვუთხარი, რომ თუ შეაფურთხებენ, როგორც უნდათ, ისე მოიქცნენ. წინა ადმინისტრაციის დროს ვერაფერს აკეთებდნენ, როცა მათ სახეში აფურთხებდნენ. ამას უმეტესად ქალი აგიტატორები აკეთებენ, რომლებიც დაფინანსებული არიან. ესენი ნამდვილი თაღლითები არიან, რომლებიც მეც მომიგზავნეს. ეს ხალხი ციხეში უნდა იჯდეს. ჩარლი კირკის მკვლელი ინტერნეტში მარტო არ მოქმედებდა. მისი რადიკალიზება მემარცხენე მხარემ, სწორედ ინტერნეტ-სივრცეში მოახდინა“, – თქვა ტრამპმა.
