საქართველოს პრემიერ-მინისტრის, ირაკლი კობახიძის განცხადებით, ევროპული პოლიტიკური გაერთიანების (EPC) მერვე სამიტის ფარგლებში უკრაინის პრეზიდენტ ვოლოდიმირ ზელენსკისთან შეხვედრაზე იყო მეგობრული და საინტერესო საუბარი.
პრემიერის თქმით, დახურული ფორმატიდან გამომდინარე, შეხვედრის დეტალებზე ვერ ისაუბრებს.
„შინაარსზე ვერაფერს ვიტყვი, გამომდინარე იქედან, რომ ეს იყო დახურული ფორმატის შეხვედრა. თუმცა, ზოგადად შემიძლია გითხრათ, რომ იყო მეგობრული და საინტერესო საუბარი, რაც შედგა ჩვენს შორის. თავად პრეზიდენტმა გამოთქვა ეს ინიციატივა. ჩვენ მყისიერად დავუდასტურეთ ჩვენი მზაობა და გავისაუბრეთ ორმხრივ ურთიერთობებთან დაკავშირებით. არსებითად ეს იყო ამ საუბრის საგანი. კიდევ ერთხელ ვიტყვი, რომ ჩვენ შორის იყო საინტერესო საუბარი და ძალიან მეგობრული.
ზოგადად შემიძლია გითხრათ, რომ უკრაინა ჩვენთვის არის მეგობარი ქვეყანა, ჩვენ გვაქვს ტრადიციული, ისტორიული მეგობრობა, რაც აკავშირებს ჩვენს ქვეყნებს, ჩვენს ხალხებს და ამას უნდა გავუფრთხილდეთ მაქსიმალურად. ეს იყო, მათ შორის, ის სულისკვეთება, რომელიც პრეზიდენტს გავუზიარე. რაც შეეხება დეტალებს, ამაზე ვერ ვისაუბრებ, მაგრამ კიდევ ერთხელ ვიტყვი, რომ სულისკვეთება იყო მეგობრული“, – განაცხადა ირაკლი კობახიძემ.
