ჩვენ მზად ვართ, გავაკეთოთ ყველაფერი იმისათვის, რომ უკრაინასთან ურთიერთობები მაქსიმალურად აღდგეს და ეს ყველაფერი აისახოს ხელისუფლებებს შორის ურთიერთობებში, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.
როგორც კობახიძემ აღნიშნა, გამოწვევები არსებობს, ეს გამოწვევები დაგროვდა, თუმცა საქართველოსა და უკრაინას შორის მეგობრობას, ურთიერთობას ძალიან ხანგრძლივი ისტორია აქვს.
„აქედან გამომდინარე, მზად ვართ, ყველაფერი გავაკეთოთ იმისათვის, რომ ეს ურთიერთობები მაქსიმალურად აღდგეს და ეს ყველაფერი აისახოს ხელისუფლებებს შორის ურთიერთობებში. ჩვენი მხრიდან შეიძლება, გადაიდგას ყველა გონივრული ნაბიჯი. ბუნებრივია, ვგულშემატკივრობთ უკრაინელ ხალხს, რომელიც დღეს არის ურთულეს მდგომარეობაში, ომის მდგომარეობაში, ურთულესი ეკონომიკური, სოციალური პირობებია. ყველანაირად ვგულშემატკივრობთ უკრაინელ ხალხს. ბუნებრივია, სოლიდარობას ვუცხადებთ უკრაინას, უკრაინელ ხალხს. შესაბამისად, ყველანაირად ვართ დაინტერესებული, არსებობდეს მეგობრული ურთიერთობები როგორც ქვეყნებს, ასევე ხელისუფლებებს შორის. დაველოდოთ მოვლენების განვითარებას. ჩვენი მხრიდან სრული მზაობა არსებობს, დანარჩენი ვნახოთ“, – განაცხადა ირაკლი კობახიძემ.
ცნობისთვის, საქართველოს პრემიერ-მინისტრი ირაკლი კობახიძე 4 აპრილს ევროპული პოლიტიკური გაერთიანების (EPC) მერვე სამიტის ფარგლებში უკრაინის პრეზიდენტს, ვოლოდიმირ ზელენსკის შეხვდა.
საქართველოს მთავრობის ინფორმაციით, ირაკლი კობახიძისა და ვოლოდიმირ ზელენსკის შეხვედრა უკრაინული მხარის ინიციატივით გაიმართა და ორი ქვეყნის ურთიერთობებზე ისაუბრეს.
ამასთან, უკრაინულმა მედიამ გაავრცელა ინფორმაცია, რომლის მიხედვითაც, უკრაინის პრეზიდენტმა, ვოლოდიმირ ზელენსკიმ უკრაინის მხრიდან სომხეთთან, საქართველოსთან და სლოვაკეთთან რამდენიმე მიმართულებით ურთიერთობების განბლოკვის შესახებ განაცხადა.
ამასთან, ზელენსკიმ უკრაინულ მედიასთან საქართველოს პრემიერ-მინისტრთან, ირაკლი კობახიძესთან შეხვედრის შესახებ ისაუბრა.
„დიდი ხნის განმავლობაში პირველად, საქართველოს პრემიერთან პირისპირ ხანმოკლე საუბარი გვქონდა, მიმაჩნია, რომ ესეც სწორია“, – განაცხადა ვოლოდიმირ ზელენსკიმ.
