ვოლოდიმირ ზელენსკისთან გუშინდელი საუბრის დეტალებზე ვერ ვისაუბრებ, მაგრამ პრობლემები რაც იყო, ბუნებრივია, რჩება, არსად წასულა არც ადეიშვილი, არც ლორთქიფანიძე, არც ის განცხადებები, რომლებიც კეთდებოდა, არც ელჩის გაწვევის გადაწყვეტილება, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.
მისი თქმით, გუშინ არსებითად კონცენტრირებულები იყვნენ მეგობრულ საუბარზე და ეს იყო სულისკვეთება, რაც იყო ძალიან მნიშვნელოვანი.
როგორც კობახიძემ აღნიშნა, პრობლემები რჩება, თუმცა მნიშვნელოვანია მომავალზე ორიენტირება.
„სიღრმეში არ შევსულვართ, მათ შორის პრობლემებთან დაკავშირებით. რა თქმა უნდა, პრობლემები იყო და ეს პრობლემები არსად წასულა, მაგრამ ჩვენ უნდა ვიყოთ მომავალზე ორიენტირებული. მე პირადად ზელენსკი ნეგატიურ კონტექსტში არასდროს მიხსენებია და ამას აქვს ერთი მარტივი მიზეზი, მიუხედავად დაგროვილი პრობლემებისა, ზელენსკი არის იმ ქვეყნის პრეზიდენტი, რომელიც არის ომის მდგომარეობაში და ეს ქვეყანა არის ჩვენი მეგობარი ქვეყანა. აქედან გამომდინარე, მე ყოველთვის ვუფრთხილდებოდი ჩემს სიტყვებს კონკრეტულად პრეზიდენტთან, ბატონ ზელენსკისთან დაკავშირებით. პრობლემები რაც იყო, რა თქმა უნდა, არსად წასულა, თუმცა ჩვენ უნდა ვიყოთ მომავალზე ორიენტირებული“, – აღნიშნა პრემიერმა.
ამასთან, პრემიერ-მინისტრმა აღნიშნა: „ვგულშემატკივრობთ უკრაინელ ხალხს, სოლიდარობას ვუცხადებთ უკრაინას, დაინტერესებული ვართ, არსებობდეს მეგობრული ურთიერთობები როგორც ქვეყნებს, ასევე ხელისუფლებებს შორის“.
ცნობისთვის, საქართველოს პრემიერ-მინისტრი ირაკლი კობახიძე 4 აპრილს ევროპული პოლიტიკური გაერთიანების (EPC) მერვე სამიტის ფარგლებში უკრაინის პრეზიდენტს, ვოლოდიმირ ზელენსკის შეხვდა. საქართველოს მთავრობის ინფორმაციით, ირაკლი კობახიძისა და ვოლოდიმირ ზელენსკის შეხვედრა უკრაინული მხარის ინიციატივით გაიმართა და ორი ქვეყნის ურთიერთობებზე ისაუბრეს.
ამასთან, უკრაინულმა მედიამ გაავრცელა ინფორმაცია, რომლის მიხედვითაც, უკრაინის პრეზიდენტმა, ვოლოდიმირ ზელენსკიმ უკრაინის მხრიდან სომხეთთან, საქართველოსთან და სლოვაკეთთან რამდენიმე მიმართულებით ურთიერთობების განბლოკვის შესახებ განაცხადა.
ზელენსკიმ უკრაინულ მედიასთან საქართველოს პრემიერ-მინისტრთან, ირაკლი კობახიძესთან შეხვედრის შესახებ ისაუბრა.
„დიდი ხნის განმავლობაში პირველად, საქართველოს პრემიერთან პირისპირ ხანმოკლე საუბარი გვქონდა, მიმაჩნია, რომ ესეც სწორია“, – განაცხადა ვოლოდიმირ ზელენსკიმ.
