შაბათი, ივნისი 22, 2024
Google search engine
Homeმთავარი ამბავიმამუკა მდინარაძე: დონორების მხრიდან იყო პირობა, რომ დაფინანსება იქნებოდა გამჭვირვალე, თუმცა კიდევ...

მამუკა მდინარაძე: დონორების მხრიდან იყო პირობა, რომ დაფინანსება იქნებოდა გამჭვირვალე, თუმცა კიდევ უფრო გაუმჭვირვალე და შავი გახდა ის ფული, რომელიც სხვადასხვა მიმართულებით შემოდიოდა ქვეყანაში

შარშან, შეხვედრების დროს დონორების მხრიდან იყო პირობა, რომ დაფინანსება იქნებოდა გამჭვირვალე და ჩვენ კანონს არ დავაბრუნებდით. როდესაც მეორე მხრიდან პირობა არა თუ არ შესრულდა, არამედ გამჭვირვალობის მდგომარეობა გაუარესდა, გადავწყვიტეთ, რომ მივიღოთ კანონი, – ამის შესახებ „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა მამუკა მდინარაძემ განაცხადა.

მისივე თქმით, კანონი დაინიცირდება ჩვეულებრივად, ყოველგვარი დაჩქარებების გარეშე.

„მართლებს არასდროს არაფრის ეშინიათ. ჩვენ გუშინაც კი გავიმეორეთ სიტყვები, რაც შარშან ბევრმა ჩვენმა თანაგუნდელმა თქვა, რომ ჩვენ ბოლო მომენტამდე ვიმეორებდით და ვამბობდით, რომ კანონს არ დავაბრუნებთ. მეორე მხრიდან, დონორების მხრიდან შეხვედრების დროს იყო პირობა, რომ დაფინანსება იქნებოდა გამჭვირვალე და ამის ფონზე გამჭვირვალე კი არა კიდევ უფრო გაუმჭვირვალე და შავი გახდა ის ფული, რომელიც სხვადასხვა მიმართულებით შემოდიოდა ქვეყანაში. ახლა, რაც მთავარია მერე ამას როგორ ნიშნისმოგებით აღნიშნავდნენ სხვადასხვა აქტორები. მაგალითად, ნიკა გვარამიამ თქვა, რომ მიზნობრიობის გარეშე მისცეს გრანტი. ეს ხომ ტყუილია?! ე.ი. რამდენად გააშავა ფული, რომ მან პირადად თქვა, გასკდით გულზე, მიზნობრიობის გარეშე დაგვიმტკიცდა გრანტიო. უკვე აღარც ერიდებიან, ადრე თუ იგონებდნენ და რაღაც კეთილშობილურ მიზნებს ასახელებდნენ, ახლა პირდაპირ თავხედურად აცხადებენ, რომ დიახ, ჩვენ დაგვიმტკიცდება მილიონები მიზნობრიობის გარეშე. როდესაც უკვე მეორე მხრიდან პირობა არა თუ არ შესრულდა, არამედ გამჭვირვალობის მდგომარეობა გაუარესდა, ჩვენ მივიღეთ გადაწყვეტილება, რომ მივიღოთ კანონი, დავაინიციროთ დღესვე, ყოველგვარი დაჩქარების გარეშე, მოვიდნენ და წარმოადგინონ არგუმენტები. შარშანდელ შემთხვევაში იყო უკიდურესი პროვოკაციების რისკი, რასაც დავაზღვევთ მაქსიმალურად, მათ შორის, საინფორმაციო თვალსაზრისითაც. ერთი რამ უნდა ვაღიაროთ, შარშან კომუნიკაციის თვალსაზრისით ბოლომდე გამართულები არ ვიყავით, რადგან ერთი წლის განმავლობაში არაერთი ადამიანი მინახავს, რომელსაც პირადად ჩემთვის უთქვამს, რომ იყო უდიდეს შეცდომაში შეყვანილი, რომ მართლაც ეგონათ რუსული კანონი. წაუკითხავი კანონი გააპროტესტებინეს ადამიანებს და წარმოდგენა არ ჰქონდათ მათ რა კანონზე იყო საუბარი და უბრალოდ აღშფოთდნენ იმიტომ, რომ ეს კანონი ეგონათ რუსული. მეტი არავის არაფერი წაუკითხავს“, – აღნიშნა მამუკა მდინარაძემ.

საპარლამენტო უმრავლესობამ მიიღო გადაწყვეტილება „უცხოური გავლენის გამჭვირვალობის შესახებ“ კანონპროექტი პარლამენტში ხელახლა წარადგინოს.

- Advertisment -
Google search engine

პოპულარული

>