ეს შეძლეს ჩვენმა იმ გმირმა ბიჭებმა, რომელთა მოტივაციაც და კუმირიც თავის დროზე რონალდუ იყო, მას მოუგეს გუშინ ორთაბრძოლა, – განაცხადა საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა მამუკა მდინარაძემ ევრო 2024-ზე საქართველო-პორტუგალიის მატჩის შეფასებისას.
მისი თქმით, ეროვნულმა ნაკრებმა დაამტკიცა, რომ შეუძლებელი არაფერია.
„ამიტომ ჩვენ ვემზადებით მოგებისთვის, ჩვენი ეროვნული ნაკრები ემზადება მოგებისთვის. ხომ ვერავის წარმოედგინა, ალბათ, ცოტა ხნის წინ, რომ ერთ-ერთი მსოფლიო ლიდერი ჩვენს გუნდთან შეხვედრის დროს უგოლოდ და წარმატების გარეშე დატოვებდა მოედანს. ხომ ვერავის წარმოედგინა, მაგრამ ეს შეძლეს ჩვენმა იმ გმირმა ბიჭებმა, რომელთა მოტივაციაც და კუმირიც თავის დროზე რონალდუ იყო და მას მოუგეს გუშინ ორთაბრძოლა. წარმოუდგენელი ამბავი დადეს. დიდი მადლობა, გულწრფელი მადლობა ასეთი სიამაყისათვის თითოეულ მათგანს”, – განაცხადა მამუკა მდინარაძემ.
საქართველოს ეროვნულმა ნაკრებმა პორტუგალია 2:0 დაამარცხა. ამ გამარჯვებით მან პლეი ოფის საგზური მოიპოვა.
