26 ოქტომბერს საქართველოში შედგა უკიდურესად პრინციპული არჩევნები, საზოგადოებამ მხარი დაუჭირა ჩვენი ქვეყნის მშვიდობიან განვითარებას, ნათელ და ევროპულ მომავალს, – ამის შესახებ საქართველოს პრემიერ-მინისტრობის კანდიდატმა, ირაკლი კობახიძემ პარლამენტის პლენარულ სხდომაზე სიტყვით გამოსვლისას განაცხადა.
ამასთან, კობახიძის თქმით, 2024 წლის საპარლამენტო არჩევნები თავისი მნიშვნელობით 2012 წლის საპარლამენტო არჩევნების ტოლფასი იყო.
„მინდა, კიდევ ერთხელ ხაზი გავუსვა იმ არჩევნების მნიშვნელობას, რომელიც შედგა საქართველოში 2024 წლის 26 ოქტომბერს. ეს იყო უკიდურესად პრინციპული არჩევნები. მიუხედავად იმისა, რომ ყველა წინა არჩევნები იყო ერთმანეთზე მნიშვნელოვანი, ასეთი პრინციპული მნიშვნელობის მქონე არჩევნები ჩვენ მაინც არ გვქონია. 2024 წლის საპარლამენტო არჩევნები თავისი მნიშვნელობით იყო 2012 წლის საპარლამენტო არჩევნების ტოლფასი და ჩვენ საზოგადოებას ნათლად დავანახეთ, რას ეხებოდა ეს არჩევნები. ეს იყო ერთგვარი რეფერენდუმი ომსა და მშვიდობას შორის და საზოგადოებამ მხარი დაუჭირა ჩვენი ქვეყნის მშვიდობიან განვითარებას. ეს იყო ერთგვარი რეფერენდუმი ამორალურ პროპაგანდასა და ტრადიციულ ფასეულობებს შორის და ჩვენმა საზოგადოებამ მხარი დაუჭირა სწორედ ტრადიციულ ფასეულობებს. ეს იყო არჩევანი ბნელ წარსულში დაბრუნებასა და ქვეყნის ნათელ და ევროპულ მომავალს შორის და ამ შემთხვევაშიც, საზოგადოებამ მხარი დაუჭირა ქვეყნის ნათელ და ევროპულ მომავალს“, – აღნიშნა კობახიძემ.
მისივე თქმით, ყველამ იცის, სად უნდოდათ ქვეყნის დაბრუნება, რას განასახიერებენ ის ძალები, რომლებიც ცდილობდნენ ძალაუფლების ხელახლა ხელში ჩაგდებას.
„მათი ხელწერა, ცხრა წლის განმავლობაში ხელისუფლებაში ყოფნისას, იყო ადამიანების წამება, მკვლელობა, ბიზნესის სისტემური რეკეტი, მედიის მიტაცება, ომი, ქვეყნის ტერიტორიების დაკარგვა და ა.შ. ეს არის იმ დანაშაულების არასრული ჩამონათვალი, რომელიც ამ ადამიანებს აქვთ ჩადენილი. რა თქმა უნდა, თეორიულად მათი ხელისუფლებაში დაბრუნება ნიშნავდა იმ ყველაფრის დაბრუნებას, რაზეც ახლა გვქონდა საუბარი და ეს ქართულმა საზოგადოებამ, ბუნებრივია, არ დაუშვა. სამწუხაროდ, ამ ადამიანებს ჯერ კიდევ ჰქვიათ ოპოზიცია. დღეს მათი სკამები ცარიელია, თუმცა ისიც უნდა ითქვას, რომ დღეს რომ ისინი აქ ისხდნენ, ეს სკამები ზუსტად ისეთივე ცარიელი იქნებოდა, როგორიც არის დღეს.
მინდა, მადლობა გადავუხადო ქართველ ხალხს. სწორედ ქართველმა ხალხმა მოგვანიჭა ჩვენ იმის მანდატი, რომ შემდეგი ოთხი წლის განმავლობაში ვიზრუნოთ ჩვენი ქვეყნის სტაბილურ, მშვიდობიან განვითარებაზე. მინდა, ასევე ვისარგებლო შემთხვევით და კიდევ ერთხელ მადლობა გადავუხადო ჩვენი გუნდის ლიდერს, ჩვენი პარტიის დამფუძნებელს, ბიძინა ივანიშვილს. სწორედ მისი დამსახურებაა, რომ დღეს ქვეყანას აქვს მშვიდობა და შესაძლებლობა, იფიქროს განვითარებაზე, წინსვლაზე. მადლობა მას კიდევ ერთხელ ამ შესაძლებლობისთვის, რომელიც ჩვენს ქვეყანასა და ხალხს მიანიჭა“, – განაცხადა ირაკლი კობახიძემ.
