დღემდე არდაინტერესება ერთი ადამიანის მიერაც კი, რომ გაეცნოს მის კადრებს, ეს არის მიზანმიმართული იმისათვის, რომ უბრალოდ, არ უნდათ, სიმართლეს ჩახედონ თვალებში და არც კადრებში, – განაცხადა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ მამუკა მდინარაძემ ელენე ხოშტარიას საქმესთან დაკავშირებით, რომელიც აცხადებდა, რომ დაკავებისას აწამეს.
მამუკა მდინარაძემ აღნიშნა, რომ თუ ვინმეს ეჭვი ეპარებოდა, რომ ხოშტარიას ვინმე არაკანონიერად და ცუდად მოექცა, დღეს ეჭვი არავის აღარ უნდა ეპარებოდეს იქიდან გამომდინარე, რომ ადვოკატმაც კი არ ისურვა უწყვეტი კადრების გაცნობა.
„აქ საუბარი შინაგან საქმეთა სამინისტროს არ ჰქონია გასაჯაროებაზე. საუბარია, რომ მისი ადვოკატი მაინც არ ნებისმიერი პირი, ვინც შეიძლება მართლა დაინტერესებული იყოს სიმართლის გაგებით, გაეცნოს უწყვეტ მასალას. ხომ ამბობენ, რომ სასტიკად ნაწამებია. მივიდეს ნებისმიერი პირი, ამას სთავაზობს შინაგან საქმეთა სამინისტრო და ამ „საშინელი წამების“ კადრებს გაეცნოს. როგორც სამინისტროში აცხადებენ, უწყვეტ კადრად არის მისი გადაადგილება, ნებისმიერი მოქმედება – ძალიან მაღალი ალბათობით, კანონიერი მის მიმართ განხორციელებული, რაც არის სტანდარტული პროცედურა, ყოველგვარი უფლებრივი მდგომარეობის და ნორმის დაცვით. დღემდე არდაინტერესება ერთი ადამიანის მიერაც კი, რომ გაეცნოს მის კადრებს, ეს არის მიზანმიმართული იმისათვის, რომ უბრალოდ, არ უნდათ, სიმართლეს ჩახედონ თვალებში და არც კადრებში”, – განაცხადა მამუკა მდინარაძემ.
მისი შეფასებით, სამწუხაროა, რომ ამ თემაზე მატყუარათა რიგს შეუერთდა PACE-ს სადამკვირვებლო მისიის ხელმძღვანელი.
„ჩამოვიდეს PACE-ს სადამკვირვებლო მისიის ხელმძღვანელი და თუ უნდა, თუ ამის ნებას მისცემს ქალბატონი ხოშტარია, პირადად გაეცნოს, ან გამოაგზავნოს ვინმე, ვინც პირადად გაეცნობა უწყვეტ კადრებს, როცა ის იყო დაკავების იზოლატორში თუ შესაბამის ადგილას. ამის შემდეგ თუ კიდევ გააგრძელებენ, გააგრძელონ, მაგრამ ზუსტად იციან დღესაც, რომ იტყუებიან და სამწუხაროდ, ამ მატყუარათა რიგს შეუერთდა PACE-ს სადამკვირვებლო მისიის ხელმძღვანელი.
იყო დრო, როდესაც ასეთ საუბარს ვერიდებოდით იმიტომ, რომ დამოუკიდებლობის ხარისხი არ იყო მაშინ ისეთი, რომელიც საშუალებას მოგვცემდა, სიმართლე ბოლომდე გვეთქვა და ტყუილზე გვეთქვა, რომ ის იტყუება. ვამბობდით, რომ სამწუხარო განცხადებაა, იქნება, იქნებ, გაირკვეს და ასე შემდეგ იმიტომ, რომ მეტის თავი სამწუხაროდ, ამ ქვეყანას იმ პერიოდში არ ჰქონდა, მაგრამ როგორც იქნა, დადგა ის, რომ როცა ვიტყვით თავისუფლად და არავის შევეპუებით, რომ PACE-ს სადამკვირვებლო მისიის ხელმძღვანელი მიზანმიმართულად იტყუება. მშვენივრად იცის და დარწმუნებული ვარ, არანაირ შეცდომასთან არ შეიძლება, გვქონდეს საქმე, რომ არავის უწამებია [ელენე ხოშტარია] და არა თუ უწამებია, მის უფლებებთან დაკავშირებით ხარვეზიც კი არ ყოფილა და ამას ადასტურებს უწყვეტი კადრი, რომლის გაცნობაც ამ წუთამდე პირდაპირი მოწოდების მიუხედავად, არავინ მოინდომა”, – აღნიშნა მამუკა მდინარაძემ.
