მადლობა მინდა, გადავუხადო პარტიის საპატიო თავმჯდომარეს, ბატონ ბიძინა ივანიშვილს ჩემი კანდიდატურის მხარდაჭერისთვის, – ამის შესახებ პრემიერ-მინისტრმა ირაკლი კობახიძემ ჟურნალისტებს განუცხადა.
კითხვაზე, თუ რით დაიმსახურა ირაკლი კობახიძემ ეს ყველაფერი, პრემიერ-მინისტრმა განაცხადა, რომ საკუთარ დამსახურებაზე თავად ვერ ისაუბრებს და ამას აფასებენ პარტიის წევრები და ყრილობის დელეგატები.
„რაც შეეხება დამსახურებას, ამას მე ვერ შევაფასებ, დამსახურებას აფასებს პარტიის ყრილობის დელეგატი, აფასებენ ჩვენი პარტიის წევრები, რა თქმა უნდა, მადლობა მინდა გადავუხადო პარტიის საპატიო თავმჯდომარეს, ბატონ ბიძინა ივანიშვილს ჩემი კანდიდატურის მხარდაჭერისთვის. რაც შეეხება დამსახურებას, მე როგორ ვილაპარაკო ჩემს თავზე, ეს არის გადაწყვეტილება, რომელიც ჯერ მიიღო პოლიტიკურმა საბჭომ, როცა გადაწყდა ჩემი კანდიდატურის წარდგენა და შემდეგ მიიღეს გადაწყვეტილება დელეგატებმა,“- განაცხადა ირაკლი კობახიძემ.
