„გამჭვირვალობის შესახებ კანონზე“, იმავე ახალ „ფარას“ კანონზე, ჩვენ გვაქვს მწვანე შუქი, რეალურად, ტრამპის ადმინისტრაციის მხრიდან. პირდაპირ განცხადებებს კი არ ვგულისხმობ, ვგულისხმობ იმ განცხადებებს, რომლებიც ზოგადად გაკეთდა ამ თემასთან დაკავშირებით, – ამის შესახებ საქართველოს პრემიერ-მინისტრმა, ირაკლი კობახიძემ პირველი არხის გადაცემაში „აქტუალური თემა“ განაცხადა.
პრემიერის თქმით, პირდაპირ ქმედითი ნაბიჯები გადაიდგა, პირდაპირ აკრძალეს USAID-ი და NED-ი იმ საფუძვლით, რომ ეს ორგანიზაციები, ეს ფონდები ეწეოდნენ სხვა ქვეყნებში, მათ შორის, ლგბტ პროპაგანდას, ე.წ. გენდერულ პროპაგანდას, მიდიოდა რევოლუციების მხარდაჭერა, დაფინანსება და ა.შ.
„პრეზიდენტ ტრამპის ადმინისტრაცია არის ჩვენს მხარეს, ყოველ შემთხვევაში ეს იკვეთება მათი საჯარო განცხადებებიდან. რაც შეეხება გამჭვირვალობის შესახებ კანონმდებლობას, პირდაპირ აღიარა ტრამპის ადმინისტრაციამ, რომ კონკრეტული ფონდები, მათ შორის, პირდაპირ დასახელებით USAID-ი, NED-ი გამოიყენებოდა სხვადასხვა ქვეყანაში რევოლუციების მოსაწყობად, ქვეყნების ასარევად. პირდაპირ არის აღიარებული. აქედან გამომდინარე, არა მარტო გამჭვირვალობაზე შეიძლება იყოს საუბარი ამ ფონზე, პირდაპირ თვითონ აკრძალეს ეს ფონდები. რომელიმე ჩვენი თანამოქალაქე, რომელიც „რუსულ კანონს’’ უწოდებდა „გამჭვირვალობის კანონს“, მივიდა ამერიკის საელჩოსთან და გააპროტესტა USAID-ისა და NED-ის აკრძალვა? რატომ არ გააპროტესტეს, თუ მათ ეს თემა აწუხებდათ? არ გააპროტესტეს, რადგან მათ ჰქონდათ უბრალოდ „დიფ სთეითისგან“ მიღებული ჩვეულებრივი პოლიტიკური დაკვეთა. რატომ არ წავიდნენ, მაგალითად, ეს ოპოზიციონერი პოლიტიკოსები ან NGO-ები და რატომ არ გააპროტესტეს ამერიკის საელჩოსთან პრეზიდენტ ტრამპის ეს გადაწყვეტილება? იმიტომ, რომ „დიფ სთეითისგან“ მიიღეს განსხვავებული დავალება.
რაც შეეხება „გამჭვირვალობის შესახებ კანონს“, იმავე ახალ „ფარას“ კანონს, ამასთან დაკავშირებით ჩვენ გვაქვს მწვანე შუქი, რეალურად, ტრამპის ადმინისტრაციის მხრიდან. პირდაპირ განცხადებებს კი არ ვგულისხმობ, ვგულისხმობ იმ განცხადებებს, რომლებიც ზოგადად გაკეთდა ამ თემასთან დაკავშირებით. არამარტო განცხადებებს, პირდაპირ ქმედითი ნაბიჯები გადაიდგა, პირდაპირ აკრძალეს USAID-ი და NED-ი იმ საფუძვლით, რომ ეს ორგანიზაციები, ეს ფონდები ეწეოდნენ სხვა ქვეყნებში, მათ შორის, იგივე ამ ლგბტ პროპაგანდას, ე.წ. გენდერულ პროპაგანდას, მიდიოდა რევოლუციების მხარდაჭერა, დაფინანსება და ა.შ. ათასი უბედურება. ჩვენს შემთხვევაში ეს იყო, მათ შორის, მართლმადიდებელ ეკლესიაზე შეტევა. გახსოვთ, ისეთი ორგანიზაციები, როგორებიცაა იგივე „სირცხვილია“, „პრაიდი“ და ა.შ. რისთვის იღებდნენ ფულს? პირდაპირ თავდასხმები მართლმადიდებელ ეკლესიაზე, სახელმწიფო ინსტიტუტებზე, მათი დაკნინების მცდელობა. ეს ყველაფერი დევს ხელისგულზე. ამ ფონზე როგორ შეიძლება, საერთოდ ვისაუბროთ, არათუ უნდა გადავსინჯოთ „გამჭვირვალობის შესახებ“ კანონმდებლობა, პირიქით, ახალ ინსტრუმენტებზე უნდა ვიფიქროთ, რათა მომავალში აღარავის მოუვიდეს თავში აზრად ჩვენი სუვერენიტეტის ხელყოფა, თუნდაც მცდელობის დონეზე“, – აღნიშნა მთავრობის მეთაურმა.
ირაკლი კობახიძემ ასევე ისაუბრა კანონზე „არასრულწლოვანთა დაცვის და ოჯახური ფასეულობების შესახებ“.
„რაც შეეხება კანონს „არასრულწლოვანთა დაცვის და ოჯახური ფასეულობების შესახებ“, აქაც იგივეა. თქვენ ნახეთ პრეზიდენტ ტრამპის განცხადებები, პირდაპირ დაუპირისპირდა ამ პროპაგანდას, რაც არის სრული სიმახინჯე და, პრაქტიკულად, თავისი განცხადებებით მოიწონა, ვგულისხმობ ირიბად, იმ კანონის სულისკვეთება, რომელიც ჩვენ მივიღეთ. რჩება „დიფ სთეითის“ აგენტურა, რომელიც არის ჯერ კიდევ ჩაბუდებული ამერიკის ბიუროკრატიაში და იმედია, აქ ბრძოლა დასრულდება პრეზიდენტ ტრამპის გამარჯვებით, და კიდევ უფრო მძიმედ არის ჩაბუდებული ეს ბიუროკრატია, ეს აგენტურა ევროპულ ბიუროკრატიაში. აქედან გამომდინარე, იმ ფონზე, როდესაც, მით უმეტეს, ყველაზე დიდმა სახელმწიფომ, ამერიკის შეერთებულმა შტატებმა, მისი ახალი ხელისუფლების სახით, აღიარა ის მანკიერებები, რომლებზეც ჩვენ ვსაუბრობდით ამ ოთხი წლის განმავლობაში, როგორ შეიძლება, ჩვენ ვისაუბროთ ამ კანონების გადახედვაზე? ყველამ ხომ ნახა, რომ ეს კანონი, მაგალითად, „გამჭვირვალობის შესახებ“ კანონი იყო არათუ სწორი, არამედ აუცილებელიც მისაღებად, რათა მომავალში გარე დაფინანსებით, იმავე USAID-ის, NED-ის, მსგავსი ფონდების მეშვეობით, EED, რომელიც ჯერ კიდევ მოქმედი ფონდია ევროკავშირში, არ შეიძლება, რომ ასეთი ფონდების მეშვეობით ვინმემ სცადოს ჩვენს ქვეყანაში ვითარების არევა. არ შეიძლება, ეს სიმახინჯე გაგრძელდეს, რასაც ვხედავდით. ეს „ენჯეოები“ იყო ჩვეულებრივი აგენტურა, რომელთა მეშვეობითაც ცდილობდნენ, ქვეყანაში მოეყვანათ უკვე ხელისუფლებაში აგენტურა და ეს არ შეიძლება, ასე გაგრძელდეს. ჩვენ ვსაუბრობდით გამჭვირვალობაზე და ეს დღესაც არის აქტუალური“, – განაცხადა ირაკლი კობახიძემ.
