გენერალური პროკურორის არჩევის წესი რომ მარტივდება, ეს უკვე თქვენთვის ცნობილია. კონსტიტუციით გათვალისწინებული ადამიანებისა თუ ორგანიზაციების ჩართულობა გენპროკურორის წარდგენის წესში სავალდებულო აღარ იქნება, – განაცხადა „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ, მამუკა მდინარაძემ საპარლამენტო უმრავლესობის სხდომის დასრულების შემდეგ გამართულ ბრიფინგზე.
მან განმარტა, რომ საპარლამენტო უმრავლესობის ინიციატივით, გენერალური პროკურორის არჩევისთვის რაც არის კონსტიტუციითა გათვალისწინებული, მხოლოდ ისე მოხდება.
„ალბათ, თქვენ გახსოვთ, რომ ეს ერთ-ერთია იმ საკითხებიდან, რომელიც იყო თავს მოხვეული და ჩვენ გვიწევდა კონსტიტუციის მიღმა – ოღონდ, არა მის წინააღმდეგ, ობიექტურობისთვის ესეც უნდა ითქვას, ისეთი რეგულაციების ჩამატება კანონებში, რომელიც ართულებდა ამ პროცედურებს. კონსტიტუციით გათვალისწინებულია წარმდგენიც, მაგრამ ჩამატებული არასამთავრობო ორგანიზაციები თუ სხვა სუბიექტები, ართულებდა ამ პროცედურას და ვამარტივებთ, რაც არის კონსტიტუციით გათვალისწინებული, ვტოვებთ მხოლოდ მას“, – აღნიშნა მდინარაძემ.
