ჩვენ უნდა მივეჩვიოთ, რომ არ გავაკეთოთ განცხადებები იმ ლოგიკაზე, რომელი ლოგიკითაც მოქმედებს სხვა, – განაცხადა „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ, მამუკა მდინარაძემ შინაგან საქმეთა სამინისტროში განხორციელებულ საკადრო ცვლილებებზე საუბრისას.
„ლოგიკაზე თუ არის საუბარი, ეს გეკა გელაძეს უნდა ჰკითხოთ, რა ლოგიკით განხორციელდა ის გადანაცვლებები. 90%-ზე მეტი იყო გარკვეული როტაცია და ამას მივესალმებით. მიმაჩნია, რომ 6, 7 და 10 წელი ერთი და იმავე თანამდებობაზე, აღმასრულებელ რგოლში, საპოლიციო და მსგავს უწყებებში ადამიანი არ უნდა მუშაობდეს. მაგალითად შემიძლია მოვიყვანო ვაჟა სირაძე, რომელიც არის უდავოდ სერიოზული პროფესიონალი და თავისი ქვეყნის ერთგული ჯარისკაცი. ის დიდი წარმატებით ართმევს და ართმევდა თავს თავის მოვალეობას. მისმა პერსონამ ბევრჯერ დაამტკიცა, რომ მას შეუძლია სამაგალითო პოლიციელი იყოს. ის გადავიდა ასევე ძალიან საპასუხისმგებლო თანამდებობაზე, თბილისის პოლიციის დეპარტამენტის უფროსად, რომელსაც ქვეყანაში მინისტრის მოადგილის პოზიციას ადარებენ ხოლმე.
პროფესიონალები ახორციელებენ ამ ცვლილებას, გეკა გელაძე არის ერთ-ერთი გამორჩეული პროფესიონალი ამ საქმეში და დარწმუნებული ვარ, როგორც სხვა რამ არ ეშლება და სწორად მართავს თავის უწყებას, ასევე იქნება საკადრო გადაადგილებებიც. უკვე იგრძნობა ეს ყველაფერი.
ასევე მინდა მივესალმო მის ნაბიჯებს ბოლო დღეების განმავლობაში ქვეყანაში განხორციელებული გარკვეული რეფორმატორული მიდგომების შესახებაც კი. ვახტანგ გომელაური ძალიან დიდი წარმატებით ართმევდა ამ ყველაფერს თავს და გეკა გელაძემ მიიღო გამოწვევა, რომ კიდევ უფრო გააუმჯობესოს ასეთი რეფორმატორული დინამიკა. მათ შორის საპატრულო პოლიციის მიდგომებთან დაკავშირებით. ჩვენი მიდგომაა არ იყვნენ პრივილეგირებული და ნაკლებად პრივილეგირებული ადამიანები. ყველამ უნდა იცოდეს, რომ დარღვევა ყველასთვის არის დარღვევა. ამ მიდგომას კიდევ უფრო თუ განამტკიცებს გეკა გელაძე, ამას მივესალმებით, მოვუწონებთ და ხელს შევუწყობთ ამ მიდგომაში“, – აღნიშნა მამუკა მდინარაძემ.
